ABOUT Postal Data
 
                 မြန်မာမင်းများလက်ထက်တွင် ဘုရင့်စာချွန်တော်များကို မြင်းလျှင်တော်၊ ခြေလျှင်တော်၊ လှေလျင်တော်တို့ဖြင့် ပို့ဆောင်ခြင်းမှ အစပြု၍ ကိုလိုနီခေတ်တွင် ၁၈၂၇ ခုနှစ်၌ စစ်တွေစာတိုက်၊ ၁၈၅၂ ခုနှစ်တွင် ပဲခူးစာတိုက်နှင့် ၁၈၅၄ ခုနှစ်တွင် ရန်ကုန်စာတိုက်ကြီး တို့ကို စတင်ဖွင့်လှစ်ခြင်းဖြင့် မြန်မာနိုင်ငံတွင် စာပို့တိုက်လုပ်ငန်းကို စတင်ခဲ့ကြောင်း သမိုင်းမှတ်တမ်းများအရ သိရှိရပါသည်။ ၁၈၈၅ ခုနှစ်တွင် စာတိုက်နှင့် ကြေးနန်းနှစ်ခုကို ပူးတွဲ၍အုပ်ချုပ်ခဲ့ပြီး၊ ၁၉၃၇ ခုနှစ်၊ မတ်လ ၃၁ ရက်နေ့အထိ မြန်မာနိုင်ငံစာတိုက်နှင့် ကြေးနန်းဌာနကို အိန္ဒိယစာတိုက်နှင့်ကြေးနန်း လက်အောက်တွင် ထားရှိခဲ့ပါသည်။

                 စစ်ပြီးကာလတွင် ၁၉၄၅ ခုနှစ်၊ ဇွန်လ ၈ ရက်နေ့မှစ၍ မြန်မာဌာန အကြီးအကဲများဖြင့် စာတိုက်ဌာနကို စာတိုက်လုပ်ငန်း အုပ်ချုပ်ရေးအရာရှိ လက်အောက်တွင်လည်းကောင်း၊ ကြေးနန်းဌာနကို ဆက်သွယ်ရေးညွှန်ကြားရေး မှူး လက်အောက်တွင်လည်းကောင်း ထားရှိခဲ့ပါသည်။ ၁၉၄၇ ခုနှစ်၊ ဒီဇင်ဘာလ ၂၄ ရက်နေ့မှစ၍ စာတိုက်မင်းကြီး ရာထူးကို စာတိုက်ဌာနတွင် လည်းကောင်း၊ အင်ဂျင်နီယာချူပ်ကို ကြေးနန်းဌာနတွင်လည်းကောင်း တီထွင်ထားရှိခဲ့ ပါသည်။ မြန်မာနိုင်ငံလွတ်လပ်ရေးရရှိသည့် (၄.၁.၁၉၄၈) ရက်နေ့မှစ၍ စာတိုက်မင်းကြီးကို စာတိုက်ညွှန်ကြားရေးဝန်၊ အင်ဂျင်နီယာချုပ်ကို ကြေးနန်းညွှန်ကြားရေးဝန်အဖြစ် ပြောင်းလဲခေါ်တွင် ခဲ့ပါသည်။

                 (၄.၁၀.၁၉၄၉) ရက်နေ့တွင် မြန်မာနိုင်ငံသည် ကမ္ဘာ့စာပို့တိုက်သမဂ္ဂ UPU(Universal Postal Union) အဖွဲ့ဝင်ဖြစ်ခဲ့ပါသည်။ (၅.၅.၁၉၅၆) ရက်နေ့တွင် နိုင်ငံခြားစာပို့တိုက်ဌာနကို စတင်တည်ထောင်ခဲ့ပါသည်။

                 ၁၉၅၉ ခုနှစ်မှစ၍ ကျေးရွာအရောက် စာပို့ဆက်သွယ်ရေး၊ စာဆက်သွယ်ရေးမှန်မှန်နှင့်မြန်မြန်ရောက် ရှိရေး၊ တိုးတက်ဖွံ့ဖြိုးရေး စသည့်စီမံကိန်းများ ရေးဆွဲ အကောင်အထည်ဖော်ခဲ့ကြောင်း သိရပါသည်။ (၂၀.၁.၁၉၆၀) ရက်နေ့တွင် စာတိုက်နှင့်ကြေးနန်းဌာနတို့ကို ပြန်လည်ပေါင်းစည်းပြီး ညွှန်ကြားရေးမှူးချုပ်၏လက်အောက်တွင် ထားရှိအုပ်ချုပ်စေခဲ့ပါသည်။

                 စစ်မဖြစ်မီက မြန်မာနိုင်ငံအနှံ့အပြားတွင် စာတိုက်ကြီးငယ်ပေါင်း (၆၂၅) ခုရှိခဲ့ပြီး ၁၉၇၆ ခုနှစ်မှစ၍ စီးပွားရေးဆန်ဆန် ဆောင်ရွက်ခဲ့ရာ ၁၉၈၈-၈၉ ခုနှစ်တွင် စာတိုက်ပေါင်း(၁၁၁၅)ရုံးသို့တိုးတက်ခဲ့ပြီး ယနေ့အထိ လုပ်ငန်းပြည့်စာတိုက် (၈၀၃)ရုံး၊ စာတိုက်ခွဲ (၁၉၅)ရုံး၊ ကျေးရွာကိုယ်စားလှယ် (၃၇၁)ရုံး စုစုပေါင်း (၁၃၆၉)ဖြင့် လုပ်ငန်းဆောင်ရွက်လျက်ရှိပါသည်။

                 အမြန်ငွေပို့လွှာလုပ်ငန်းကို ၁၉၈၅ ခုနှစ်၊ ဇွန်လ ၃ရက်နေ့တွင် စတင်ဆောင်ရွက်ခဲ့ပြီး ယနေ့အထိ မြို့ပေါင်း (၁၆၆) မြို့သို့ ပေးပို့ဆောင်ရွက်လျက်ရှိပါသည်။

                 အမြန်ချောပို့လုပ်ငန်းကို ၁၉၉၂ ခုနှစ်၊ဧပြီလ (၁)ရက်နေ့တွင် စတင်အကောင်အထည်ဖော်ခဲ့ပြီး ယခုအခါ မြို့ပေါင်း (၁၆၆) မြို့ အပြန်အလှန်ချိတ်ဆက်ဆောင်ရွက်လျက်ရှိပါသည်။

                 အပြည်ပြည်ဆိုင်ရာအမြန်ချောပို့လုပ်ငန်း (EMS International) ကို ၁၉၉၅ ခုနှစ် ဇန်နဝါရီလ (၁)ရက်နေ့ မှစ၍ စင်္ကာပူနိုင်ငံနှင့် စတင်ဆောင်ရွက်ခဲ့ပြီး ယခုအခါ နိုင်ငံပေါင်း (၁၀၂) နိုင်ငံအထိ တိုးချဲ့၍ အပြန်အလှန်ပေးပို့ဆောင်ရွက်လျက်ရှိပါသည်။

                 Myanmar DHL Limited (ပြည်ပြည်ဆိုင်ရာ အမြန်ချောပို့လုပ်ငန်း) ကို ၁၉၉၇ ခုနှစ်၊ ဇန်နဝါရီလ (၁)ရက်နေ့မှစ၍ လုပ်ငန်းစတင်ဆောင်ရွက်ခဲ့ပြီင်္း နိုင်ငံပေါင်း(၂၂၇)နိုင်ငံသို့ ပြည်ပအမြန်ချောပို့လုပ်ငန်းများချိတ်ဆက် ဆောင်ရွက်လျက်ရှိပါသည်။

                 ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာန၊ ဝန်ကြီး၏ လမ်းညွှန်ချက်အရ DEMS (Domestic Express Mail Service) ပြည်တွင်းအမြန်ချောခြေရာကောက်စနစ် Track & Trace System အားပြည်တွင်းမြို့ပေါင်း (၂၆) မြို့ဖြင့် (၁.၄.၂၀၀၉) ရက်နေ့မှစ၍ ဆောင်ရွက်လျက်ရှိပါသည်။